ປາຖະກະຖາ ເອກະສານການຜ່າວົງປິດລ້ອມຂອງກອງພັນທີ 2 ວີລະຊົນທົ່ງໄຫຫີນຊຽງຂວາງ 18. 5. 1959 ແລະ ວີລະກຳໂຕນຄຸກຢ່າງມະຫັດສະຈັນຂອງບັນດາຜູ້ນໍາຂອງພັກ ແລະ ແນວລາວຮັກຊາດ 24. 5. 1960.

      ໃນຕອນເຊົ້າຂອງວັນທີ 11 ມີຖຸນາ 2019 ວາປີ ໄດ້ຈັດຕັ້ງປາຖະກະຖາເອກະສານ ການຜ່າວົງປິດລ້ອມຂອງກອງພັນທີ 2 ວີລະຊົນທົ່ງໄຫຫີນຊຽງຂວາງ 18. 5. 1959 ແລະ ວີລະກຳໂຕນຄຸກຢ່າງມະຫັດສະຈັນຂອງບັນດາຜູ້ນໍາຂອງພັກ ແລະ ແນວລາວຮັກຊາດ 24. 5. 1960. ໂດຍໃຫ້ກຽດເປັນປະທານຂອງທ່ານ ພັທ ລັງສີ ຈັນທະມາລີ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆ ວາປີ, ເຊີ່ງມີ ຮອງເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ອົງການທຽບເທົ່າ, ນາຍ ແລະພົນທະຫານ, ນາຍ ແລະ ພົນຕຳຫຼວດ, ຄະນະກໍ່ສ້າງຮາກຖານຈາກແຂວງ ເຂົ້າຮ່ວມທັງໝົດ 134 ຄົນ, ຍິງ 32 ຄົນ.

      ໃນພິທ່ານ ທ່ານ ກິແກ້ວ ໄຊຍະລາດ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ວາປີ ໄດ້ໃຫ້ກຽດຂື້ນປາຖະກະຖາ ເອກະສານ ການຜ່າວົງປິດລ້ອມຂອງກອງພັນທີ 2 ວິລະຊົນທົ່ງໄຫຫີນ ຊຽງຂວາງ 18. 5. 1959 ໂດຍທ່ານໄດ້ຍົກໃຫ້ເຫັນຄວາມໝາຍຄວາມສຳຄັນ ແລະ ເຫດການປະຫວັດສາດ ຄວາມອົງອາດກ້າຫານຂອງຜູ້ນໍາທີ່ແສນເຄົາລົບຮັກ ໃນຄ່ຳຄືນຂອງວັນທີ 18. 5.​ 1959 ພາຍໃຕ້ການບັນຊາຂອງຄະນະກອງພັນ, ແຕ່ລະກົມກອງພ້ອມກັບຄອບຄົວພະນັກງານ, ນັກຮົບທັງໝົດໄດ້ນຳໃຊ້ຄວາມມືດຖອນທັບໄປທາງທິດບ້ານ ໂຕນ-ນາແຖງ-ໜອງເຕີ້ ແລ້ວເຂົ້າປ່າໄປທາງທິດບ້ານມາຍ( ທິດຕາເວັນຕົກສ່ຽງໃຕ້ ປະມານ 15​ ກິໂລແມັດ ) ຢ່າງປິດລັບ. ໃນຕອນເຊົ້າຂອງວັນທີ 19. 5 1959 ສັດຕູບຸກເຂົ້າປົດອາວຸດ ກອງພັນທີ 2 ແຕ່ພວກເຂົາຄໍຕົກສະເງີ້ ເພາະໃນຄ້ານມີແຕ່ຄວາມງຽບ-ຫວ່າງເປົ່າ ນັບທັງເຮືອນຫ້ອງແຖວຂອງພະນັກງານທະຫານກໍ່ບໍ່ມີຮອດເງົາຄົນ. ພວກສັດຕູເຈັບແຄ້ນແໜ້ນໃຈຈື່ງໄດ້ຮີບຮ້ອນສັ່ງໃຫ້ກຳລັງໄລ່ຕາມຫວັງດັບສູນກອງພັນທີ 2, ພວກເຂົາໄດ້ລະດົມເອົາ 6 ກອງພັນທີ່ຂື້ນກັບທະຫານພາກ 2 ຂອງພວກເຂົາເພື່ອໄລ່ຕາມກອງພັນທີ 2, ນອກຈາກນັ້ນຍັງມີເຮືອບິນຊ່ວຍໜູນ ອ້ອມທົ່ງໄຫຫີນ ແລະ ຕາມທິດທາງທີ່ເຂົາຄິດວ່າກອງພັຮທີ 2 ຂະຜ່ານໄປ, ສ່ວນກອງພັນທີ 2 ພາຍຫຼັງທີ່ອອກຈາກທົ່ງໄຫຫີນແລ້ວກໍ່ໄດ້ເຄື່ອນທັບໄປຕາມທົ່ງຫຍ້າຄັງອັນຕຶບໜາເພື່ອໃຫ້ຫວິດຈາກວົງປິດລ້ອມຂອງພວກສັດຕູໂດຍມີກອງຮ້ອຍທີ 3 ເຊີ່ງເປັນກອງຮ້ອຍທີ່ເຂັ້ມແຂງ ອາດຫານນຳໜ້າເດີນທາງໄປກ່ອນໄດ້ໃຊ້ງ້າວຂ້າສັດຕູຢ່າງປິດລັບ, ທັງຕີທັງຂົນຂວາຍສັດຕູ ເພື່ອປົກປັກຮັກສາກຳລັງ ແລະ ປິດລັບເພື່ອໃຫ້ກອງພັນເຄື່ອນທັບໄປຢ່າງປອດໄພ. ພາຍຫຼັງຮັບຟັງການປາຖະກະຖາ ການຜ່າວົງປິດລ້ອມຂອງກອງພັນທີ 2 ວິລະຊົນທົ່ງໄຫຫີນ ຊຽງຂວາງ 18. 5. 1959 ແລ້ວ ທ່ານ ຄໍາສິງ ແກ້ວອຳພອນ ຄະນະທິມງານກໍ່ສ້າງຮາກຖານຂັ້ນແຂວງ ກໍ່ໄດ້ໃຫ້ກຽດຂື້ນປາຖະກະຖາ ເອກະສານ ວິລະກຳໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກ ແລະ ແນວລາວຮັກຊາດ 24.​ 5. 1960 ເຊີ່ງທ່ານໄດ້ໃຫ້ຮູວ່າ  ການໂຕນຢ່າງມະຫັດສະຈັນຄັ້ງຍ້ອນມີການນຳພາອັນສະຫຼາດສ່ອງໃສ ແລະ ປີຊາສາມາດຂອງທ່ານ ໄກສອນ ພົມວິຫານ ແລະ ສູນກາງພັກ, ຍ້ອນນ້ຳໃຈຮັກຊາດອັນແຮງກ້າຂອງບັນດາຜູ້ນຳ, ຄວາມຈົ່ງຮັກພັກດີ, ຂອງຜູ້ນໍາເຮົາທີ່ຕັດສິນໃຈຕໍ່ສູ້ຍອມເສຍສະຫຼະ ແລະ ໄດ້ຮັບການສະໜັບສະໜູນຂອງພັກ, ລັດ ແລະ ປະຊາຊົນຫວຽດນາມ, ນັບທັງສະຫາປະຊາຊາດທີ່ໄດ້ໃຫ້ການຊ່ວຍເຫຼືອ.

ອອກ​ຈາກ REPLY ເປັນ

Please enter your comment!
Please enter your name here