ເມືອງ ວາປີ ຈັດພິທີປະກາດຍຸບການຈັດຕັ້ງຄະນະພັກຮາກຖານກຸ່ມບ້ານທີ່ຂື້ນກັບອົງຄະນະພັກເມືອງ.

ໃນຕອນເຊົ້າຂອງວັນທີ 11 ມິຖຸນາ 2019 ເມືອງ ວາປີ ໄດ້ຈັດພິທີປະກາດຍຸບຄະນະພັກຮາກຖານ 05 ກຸ່ມບ້ານທີ່ຂື້ນກັບອົງຄະນະພັກເມືອງ ຂື້ນຢູ່ທີ່ສະໂມສອນໃຫຍ່ຂອງເມືອງ ວາປີ, ໂດຍໃຫ້ກຽດເປັນປະທານຂອງທ່ານ ພັທ ລັງສີ ຈັນທະມາລີ ກໍາມະການພັກແຂວງ ເລຂາພັກເມືອງ ເຈົ້າເມືອງໆ ວາປີ,ໂດຍໃຫ້ກຽດເຂົ້າຮ່ວມຂອງທ່ານ ຄຳຈັນ ແຈ່ມສະໝອນ ຄະນະປະຈໍາພັກແຂວງ ປະທານກວດກາພັກ-ລັດ ແຂວງ ສາລະວັນ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ-ຮອງຫ້ອງການອ້ອມຂ້າງເມືອງ,ທິມງານກໍ່ສ້າງຮາກຖານການເມືອງ,ເລຂາຄະນະພັກຮາກຖານ,ຕະຫຼອດຮອດເລຂາໜ່ວຍພັກບ້ານ-ນາຍບ້ານເຂົ້າຮ່ວມທັງໝົດ  113 ຄົນ, ຍິງ 14 ຄົນ.

     ຈຸດປະສົງ ກໍ່ແມ່ນເພື່ອປະຕິບັດຕາມກົດລະບຽບພັກປະຊາຊົນປະຕິວັດລາວ ສະໄໝທີ 10 ໝວດທີ 2 ມາດຕາ 10 ຂໍ້ທີ 5 ວ່າດ້ວຍການສ້າງຕັ້ງ ຫຼື ຍຸບຄະນະພັກຂັ້ນໃດໜື່ງ ແລະ ປະຕິບັດຕາມມະຕິຕົກລົງຂອງຄະນະປະຈຳພັກແຂວງ ສາລະວັນ ສະບັບເລກທີ 64/ຄຈພສ.ສວ ລົງວັນທີ 18 ມິຖຸນາ 2019 ວ່າດ້ວຍ: ການຍຸບການຈັດຕັ້ງຄະນະພັກຮາກຖານກຸ່ມບ້ານ ຈຳນວນ 5 ກຸ່ມທີ່ຂື້ນກັບອົງຄະນະພັກເມືອງ ວາປີ.ເຊີ່ງຜ່ານການກວດກາປະເມີນໃນລະບົບການເມືອງຢູ່ຂັ້ນຮາກຖານຂອງບັນດາຄະນະຮັບຜິດຊອບເຫັນວ່າລະບົບການເມືອງຢູ່ຂັ້ນຮາກຖານກຸ່ມມີການພັດທະນາ,ມີຄວາມສະຫງົບປອດໄພ ແລະ ມີລະບົບການຈັດຕັ້ງທີ່ຄົບຖ້ວນເປັນຕົ້ນ ທົ່ວເມືອງມີ 55 ບ້ານ,ມີ 7200 ກວ່າຫຼັງຄາເຮືອນ,ມີ 9000 ກວ່າຄອບຄົວ,ມີຄອບຄົວພັດທະນາ 6500 ກ່ວາຄອບຄົວ,ບ້ານພັດທະນາ 27 ບ້ານ,ມີຄອບຄົວວັດທະນະທຳທັງໝົດ 6800 ກ່ວາຄົວຄົວ,ບ້ານວັດທະນະທຳ 42 ບ້ານ,ບ້ານປອດຢາເສບຕິດ 20 ບ້ານ,ບ້ານປອດຄະດີມີ 40 ບ້ານ,ບ້ານສາມັກຄີປອງດອງ 27 ບ້ານ,ບ້ານສາທາລະນະສຸກແບບຢ່າງ 27 ບ້ານ,ບ້ານຢຸດຕິການຖ່າຍຊະຊາຍ 25 ບ້ານ,ບ້ານໜັກແໜ້ນເຂັ້ມແຂງ 10 ບ້ານ ແລະ ບ້ານທີ່ມີລະບົບການເມືອງຄົບຖ້ວນມີ 51 ບ້ານ.ພ້ອມນີ້ໃນພິທີ ທ່ານ ກິແກ້ວ ໄຊຍະລາດ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງວາປີ ໄດ້ຜ່ານມະຕິຕົກລົງຂອງຄະນະປະຈຳພັກເມືອງວາປີ ສະບັບເລກທີ 103/ຄຈພມ.ລົງວັນທີ 9 ກໍລະກົດ 2019 ວ່າດ້ວຍ ການອະນຸມັດຖອນພະນັກງານນຳພາ-ຄຸ້ມຄອງ ແລະ ພະນັກງານວິຊາການຂອງເມືອງກັບຄືນຂື້ນມາປະຈຳການຢູ່ກົມກອງເກົ່າ,ຜ່ານມະຕິຕົກລົງສະບັບເລກທີ 102/ຄຈພມ.ວປ ວ່າດ້ວຍ ການແຕ່ງຕັ້ງພະນັກງານລົງກໍ່ສ້າງຮາກຖານການເມືອງໃນ 14 ບ້ານເປົ້າໝາຍ ແລະ ບັນດາມະຕິຕົກລົງຕ່າງໆຂອງຄະນະປະຈຳພັກເມືອງ ກໍ່ຄືຄຳສັ່ງແນະນຳຂອງທ່ານເຈົ້າເມືອງໆວາປີ ໃຫ້ບັນດາທ່ານທີ່ໄດ້ເຂົ້າຮ່ວມຮັບຟັງ ແລະ ໃນຕອນທ້າຍກໍ່ໄດ້ຮັບຟັງການໂອ້ລົມຊີ໊ທິດເຍືອງທາງໃນການຈັດຕັ້ງປະຕິບັດວຽກງານຕ່າງໆພາຍໃນເມືອງຈາກທ່ານ ຄຳຈັນ ແຈ່ມສະໝອນ ຄະນະປະຈຳພັກແຂວງ ປະທານກວດກາພັກ-ລັດແຂວງ ສາລະວັນ ຕື່ມອີກ.

ອອກ​ຈາກ REPLY ເປັນ

Please enter your comment!
Please enter your name here