ເມືອງ ວາປີ ໄດ້ຈັດພິທີສະເຫຼີມສະຫຼອງວັນແພດລາວ ຄົບຮອບ 54 ປີ (18/6/1965-18/6/2019)

ໃນຕອນເຊົ້າຂອງວັນທີ 10 ກໍລະກົດ 2019 ທີ່ຜ່ານມານີ້, ຢູ່ທີ່ສະໂມສອນໃຫ່ຍຂອງເມືອງໄດ້ຈັດພິທີປະຖະກະຖາເລົ່າຄືນມູນເຊຶື້ອປະຫວັດຄວາມເປັນມາຂອງວັນແພດລາວ 18 ມິຖຸນາ ໂດຍການເປັນປະທານຂອງທ່ານ ໝໍ ດາລາ ພົມມະລືຊາ ວ່າການຫົວໜ້າຫ້ອງການສາທາລະນະສຸກເມືອງວາປີ,ໃຫ້ກຽດເຂົ້າຮ່ວມໂດຍທ່ານ ບຸນທົງ ວົງຈັນ ຄະນະປະຈຳພັກເມືອງ ຜູ້ຊີ້ນຳວຽກງານວັດທະນະທຳສັງຄົມ,ພ້ອມນີ້ກໍ່ຍັງມີຄະນະປະຈຳພັກເມືອງ,ກຳມະການພັກເມືອງ,ຫົວໜ້າຫ້ອງການ,ຮອງຫ້ອງການ,ກອງກໍ່ສ້າງຮາກຖານຂັ້ນແຂວງ,ຮອງພະແນກສາທາລະນະສຸກ,ອົງການທຽບເທົ່າ,ພະນັກງານບຳນານ ແລະ ພະນັກງານແພດ-ໝໍເຂົ້າຮວ່ມຢ່າງຫຼວງຫຼາຍ ລວມທັງໝົດ 101 ຄົນ,ຍິງ 53 ຄົນ. ເພື່ອລະນຶກເຖີງຜົນງານ ແລະ ສັນລະເສີນຄຸນງາມຄວາມດີຂອງແພດລາວ,ພ້ອມດຽວກັນນີ້ຍັງເປັນການປຸກລະດົມເຮັດໃຫ້ປະຊາຊົນທຸກຊັ້ນຄົນໃນທົ່ວສັງຄົມໄດ້ເຫັນຄວາມໝາຍສຳຄັນ ແລະ ເອົາໃຈໃສ່ເບີ່ງແຍງສຸຂະພາບຂອງຕົນໃຫ້ແຂງແຮງປາສະຈາກເຊື້ອພະຍາດຕ່າງໆ.

ທ່ານ ໝໍ ດາລາ ພົມມະລືຊາ ວ່າການຫົວໜ້າຫ້ອງການສາທາລະນະສຸກເມືອງວາປີ ໄດ້ຂື້ນເລົ່າປະຫວັດຄວາມເປັນມາຂອງວັນແພດລາວໂດຍຍົກໃຫ້ເຫັນຜົນງານຄຸນງາມຄວາມດີ,ຄວາມອົງອາດກ້າຫານ ແລະ ຄວາມເສຍສະຫຼະອັນສູງສົ່ງ,ມີຈັນຍາບັນ-ຈັນຍາທຳເຂົ້າໃນການເບີ່ງແຍງຮັກສາ ແລະ ປິ່ນປົວພະຍາດຕ່າງໆແບບພູມປັນຍາຕໍ່ໆກັນມາຂອງແພດ-ໝໍໃນສະໄໝກ່ອນໂດຍໄດ້ນຳໃຊ້ພຶດເປັນຢາຮັກສາ ແລະ ກັນພະຍາດ.ມາເຖີງສະໄໝຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານແບບເກົ່າ ແລະ ແບບໃໝ່,ພັກ-ລັດຖະບານແຫ່ງ ສປປ ລາວໄດ້ຖືເອົາວຽກງານສາທາລະນະສຸກເປັນວຽກງານໜື່ງທີ່ສຳຄັນ ແລະ ໄດ້ເອົາໃຈໃສ່ພັດທະນາຖັນແຖວພະນັກງານໂດຍໄດ້ສ້າງຕັ້ງໂຮງຮຽນແພດຊັ້ນຕົ້ນຂື້ນ ຢູ່ຖໍ້າອ່ຽງ ບ້ານເມືອງງາ ແຂວງຫົວພັນ ເຊີ່ງມີນັກຮຽນເຂົ້າຮຽນຮຸ່ນທຳອິດ 25 ຄົນ ແລະ ໄດ້ກຳນົດແນວທາງດ້ານສາທາລະນະສຸກອອກເປັນ 5 ວຽກງານໃຫ່ຍຄື:ຖືເອົາວຽກງານກັນພະຍາດເປັນສຳຄັນ,ວຽກງານປີ່ນປົວ,ສົມທົບການແພດທີ່ທັນສະໄໝ ແລະ ການແພດພື້ນເມືອງ,ສົມທົບການປີ່ນປົວດ້ວຍຢາຫຼວງ ແລະ ຢາພື້ນເມືອງ,ຫັນເອົາວຽກງານສາທາລະນະສຸກໃຫ້ເປັນຂອງທົ່ວປວງຊົນ.ນອກຈາກນີ້ຍັງໄດ້ກຳນົດຫຼັກການອະນາໄມ 3 ສະອາດເປັນຕົ້ນແມ່ນ ກິນສະອາດ,ດື່ມສະອາດ ແລະ ຢູ່ສະອາດ. ຍ້ອນເຫັນໄດ້ຄວາມໝາຍສຳຄັນຂອງພະນັກງານແພດ-ໝໍທີ່ໄດ້ປະກອບສ່ວນເຫື່ອແຮງສະຕິປັນຍາຜ່ານຜ່າອຸປະສັກເຂົ້າໃນການປີ່ນປົວພະຍາດກອບກູ້ເອົາຊີວິດຂອງປະຊາຊົນບັນດາເຜົ່າຢ່າງບໍ່ຮູ້ອິດຮູ້ເມື່ອຍ ເຮັດໃຫ້ແພດໝໍລາວຫຼາຍຄົນໄດ້ຮັບນາມມະຍົດເປັນນັກຮົບແຂ່ງຂັນ ແລະ ວິລະຊົນແຫ່ງຊາດ,ສະນັ້ນສູນກາງແນວລາວສ້າງຊາດຈື່ງໄດ້ມີມະຕິຕົກລົງສ້າງຕັ້ງພະແນກສາທາລະນະສຸກສູນກາງຂື້ນໃນວັນທີ 18 ມິຖຸນາ 1965 ແລະ ໄດ້ກຳນົດເອົາວັນດັ່ງກ່າວເປັນວັນແພດລາວ.

ຈາກນັ້ນ ທ່ານບຸນທົງ ວົງຈັນ ຄະນະປະຈຳພັກເມືອງ ຜູ້ຊີ້ນຳວຽກງານວັດທະນະທຳສັງຄົມກໍ່ໄດ້ມີຄຳເຫັນໂອ້ລົມໃຫ້ທິດຊີ້ນຳແກ່ການຈັດຕັ້ງປະຕິບັດໜ້າທີ່ວຽກງານຂອງພະນັກງານແພດ-ໝໍ ແລະ ພະຍາບານພາຍໃນເມືອງຈົ່ງເອົາໃຈໃສ່ປະຕິບັດໜ້າທີ່ວຽກງານຂອງຕົນທີ່ໄດ້ຮັບມອບໝາຍດ້ວຍຄວາມຮັບຜິດຊອບສູງ ໂດຍສະເພາະແມ່ນການບໍລິການປີ່ນປົວຄົນເຈັບທີ່ມາໃຊ້ບໍລິການພາຍໃນໂຮງໝໍເມືອງ ຫຼື ສຸກສາລາເປັນຕົ້ນແມ່ນຄົນເຈັບທີ່ທຸກຍາກຂາດເຂີນ,ຕ້ອງໄດ້ເອົາໃຈໃສ່ດູແລເບີ່ງແຍງເປັນພິເສດ ແລະ ເອົາໃຈໃສ່ຍົກລະດັບຄວາມຮູ້ຄວາມສາມາດດ້ານວິຊາສະເພາະ,ນຳໃຊ້ວັດຖຸເຕັກນິກເຄື່ອງມືການແພດອັນໃໝ່,ທັງນີ້ກໍ່ເພື່ອແນໃສ່ເຮັດໃຫ້ການປີ່ນປົວພະຍາດມີຄວາມທັນສະໄໝ ແລະ ມີປະສິດທິພາບສູງຂື້ນ.

ອອກ​ຈາກ REPLY ເປັນ

Please enter your comment!
Please enter your name here