ໃນຕອນເຊົ້າຂອງວັນທີ 21 ກຸມພາ ປີ 2019 ຫ້ອງການກວດກາ ເມືອງ ວາປີ ໄດ້ຈັດພິທີການຈັດຕັ້ງເຜີຍແຜ່ເນື້ອໃນຈິດໃຈ ວັນຕ້ານການສໍ້ລາດບັງຫຼວງສາກົນ ທີ່ສະໂມສອນໃຫ່ຍຂອງ ເມືອງ ໂດຍເປັນປະທານຂອງທ່ານ ພັທ ລັງສີ ຈັນທະມາລີ ກຳມະການພັກແຂວງ-ເລຂາພັກເມືອງ ເຈົ້າເມືອງໆ ວາປີ, ຫົວໜ້າຫ້ອງການ, ຮອງຫ້ອງການ, ພະນັກງານລັດຖະກອນຢູ່ອ້ອມຂ້າງເມືອງເຂົ້າຮ່ວມທັງໝົດ 153 ທ່ານ , ຍິງ 51 ທ່ານ. ໃນພິທີທ່ານ ບຸນຍູ້ ຈັນທະລັງສີ ຮອງເລຂາພັກເມືອງ ປະທານກວດກາພັກ-ລັດ ເມືອງ ວາປີ ບົດປາໃສ ຂອງທ່ານສີໃນ ມຽງລາວັນ ຮອງປະທານກວດກາລັດຖະບານ ແລະ ຕ້ານການສໍ້ລາດບັງຫຼວງ ເນື່ອງໃນໂອກາດ ວັນຕ້ານການສໍ້ລາດບັງຫຼວງສາກົນຄົບຮອບ 15 ປີ (9 ທັນວາ 2003-9 ທັນວາ 2018) ເຊີ່ງທ່ານໄດ້ຍັກໃຫ້ເຫັນວ່າ: ການສໍ້ລາດບັງຫຼວງ ແມ່ນປາກົດການໜື່ງທີ່ຫຍໍ້ທໍ້ ໃນກົງຈັກການຈັດຕັ້ງພະນັກງານ ແລະ ເປັນໄພທີ່ຮ້າຍແຮງ, ຂົ່ມຂູ່ກົດໜ່ວງທ່ວງດືງ ການພັດທະນາເສດຖະກິດ-ສັງຄົມ ກໍ່ຄືການພັດທະນາປະເທດຊາດ ໃຫ້ຈະເລີນຮຸ່ງເຮືອງ, ການສໍ້ລາດບັງຫຼວງ ເປັນການຕັດຮອນລາຍໄດ້ຂອງຊາດ, ຂອງລວມໝູ່ ກໍ່ຄືພົນລະເມືອງ, ດ້ວຍຫຼາຍຮູບແບບ ສ້າງຄວາມເສຍຫາຍ ໃຫ້ແກ່ຊັບສິນເງິນຄຳຂອງລັດ ນອກຈາກນັ້ນຍັງສ້າງຄວາມບໍ່ສະຫງົບ, ຄວາມບໍ່ຍຸດຕິທຳ, ນຳໄປສູ່ຄວາມບໍ່ເປັນເອກະພາບ ເກີດມີຄວາມແຕກແຍກ, ນັ້ນແມ່ນຜົນຮ້າຍ ແລະ ໄພອັນຕະລາຍຂອງການສໍ້ລາດບັງຫຼວງ. ດັ່ງນັ້ນການສະກັດກັ້ນ ແລະ ຕ້ານການສໍ້ລາດບັງຫຼວງ ແມ່ນຄວາມຮຽກຮ້ອງຕ້ອງການອັນຈຳເປັນທີ່ສຸດ ໃນການພັດທະນາປະເທດຊາດ ກໍ່ຄື ພັດທະນາ ເມືອງ ວາປີ ໃຫ້ຈະເລີນກ້າວຂື້ນຢ່າງບໍ່ຢຸດຢັ້ງ. ສໍຳລັບທິດທາງໃນຕໍ່ໜ້າ ແມ່ນສືບຕໍ່ຜັນຂະຫຍາຍຈັດຕັ້ງປະຕິບັດສົນທິສັນຍາສະຫາປະຊາຊາດ ວ່າດ້ວຍການສະກັດກັ້ນ ແລະ ຕ້ານການສໍ້ລາດບັງຫຼວງໃຫ້ຮັບຮູ້ ເຂົ້າໃຈຕໍ່ຜົນຮ້າຍ ແລະ ໄພອັນຕະລາຍດັ່ງກ່າວ, ປັບປຸງກົນໄກລະບຽບ ການກ່ຽວກັບການຕ້ານ, ສະກັດກັ້ນປາກົດການດັ່ງກ່າວ, ເພີ່ມປະສິດທິພາບໃນການຄຸ້ມຄອງລັດດ້ວຍກົດໝາຍ, ອົງການລັດແຕ່ລະຂັ້ນ ຕ້ອງເອົາໃຈໃສ່ປະຕິບັດພາລະບົດບາດ ສິດ ແລະ ໜ້າທີ່ຂອງຕົນໃຫ້ສູງຂື້ນ, ເປັນເຈົ້າການໃນການຕິດຕາມ ກວດກາການຈັດຕັ້ງປະຕິບັດ ລະບຽບກົດໝາຍຕ່າງໆຂອງລັດ, ພ້ອມທັງເພີ່ມທະວີການຮ່ວມມືກັບບັນດາ ປະເທດເພື່ອນມິດ ແລະ ອົງການຈັດຕັ້ງສາກົນ ໃຫ້ແຂງແຮງກວ່າເກົ່າເພື່ອຍາດແຍ່ງເອົາບົດຮຽນ ປະສົບການ ໃນການສະກັດກັ້ນ ແລະ ຕ້ານການສໍ້ລາດບັງຫຼວງ, ພ້ອມທັງເປັນເຈົ້າການ ໃນການເຂົ້າຮ່ວມການເຄື່ອນໄຫວວຽກງານດັ່ງກ່າວ.

ໃນຕອນເຊົ້າຂອງວັນທີ 7 ມີນາ 2019 ເມືອງ ວາປີ ໄດ້ຈັດກອງປະຊຸມ ອົງການປົກຄອງເມືອງ ວາປີ ເພື່ອສະຫຼຸບຕີລາຄາ ແຜນພັດທະນາເສດຖະກິດ-ສັງຄົມປະຈຳປີ 2018 ແລະ ທິດທາງປະຈຳປີ 2019. ຂື້ນຢູ່ທີ່ສະໂມສອນໃຫ່ຍຂອງເມືອງ ໂດຍໃຫ້ກຽດເປັນປະທານຂອງທ່ານ ພັທ ລັງສີ ຈັນທະມາລີ ກຳມະການພັກແຂວງ-ເລຂາພັກເມືອງ ເຈົ້າເມືອງໆ ວາປີ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ອົງການທຽບເທົ່າ, ທິມງານກໍ່ສ້າງຮາກຖານຂັ້ນແຂວງ ແລະ ບັນດາເລຂາໜ່ວຍພັກ-ນາຍບ້ານ, ການເງິນບ້ານໃນທົ່ວເມືອງ ເຂົ້າຮ່ວມທັງໜົດ 90 ທ່ານ, ຍິງ  3 ທ່ານ.

       ໃນກອງປະຊຸມທ່ານ ພອນທິບ ສິສະໝຸດ ຫົວໜ້າຫ້ອງການແຜນການ ແລະ ການລົງທືນ ເມືອງ ວາປີ ໄດ້ຂື້ນຜ່ານບົດສະຫຼຸບຕີລາຄາ ແຜນພັດທະນາເສດຖະກິດ-ສັງຄົມປະຈຳປີ 2018 ແລະ ທິດທາງແຜນການປະຈຳປີ 2019. ເຊີ່ງການປະຕິບັດວຽກງານໃນໄລຍະຜ່ານມາມີທັງຂໍ້ສະດວກ ແລະ ຂໍ້ຫຍຸ້ງຍາກ ຂອງວຽກງາານໃນແຕ່ລະຂົງເຂດ ແຕ່ຄະນະພັກເມືອງກໍ່ໄດ້ເອົາໃຈໃສ່ໃນການຊີ້ນຳ-ນຳພາ, ສຸມທຸກກໍາລັງພະນັກງານເຂົ້າໃນວຽກງານພັດທະນາເສດຖະກິດ-ສັງຄົມ ເຊີ່ງໄດ້ມີຜົນສຳເລັດທີ່ພົ້ນເດັ່ນຫຼາຍດ້ານ ດ້ວຍຈິດໃຈສູ້ຊົນບຸກທະລຸ ເຮັດໃຫ້ເມືອງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ ແລະ ສັງຄົມ ມີຄວາມເປັນລະບຽບຮຽບຮ້ອຍ,ເສດຖະກິດ ຍັງສືບຕໍ່ຂະຫຍາຍຕົວຕໍ່ເນື່ອງໃນລະດັບ 7,94% ລາຍໄດ້ສະເລ່ຍຕໍ່ຄົນຕໍ່ປີ 1,223 ໂດລາ. ປະຊາຊົນໄດ້ຕື່ນຕົວໃນການຜະລິດເຂົ້າ ແລະ ມັນຕົ້ນ, ລ້ຽງສັດ ເປັນສິນຄ້າ ເປັນຈໍານວນຫຼວງຫຼາຍ, ຖະໜົນຫົນທາງກໍ່ໄດ້ມີການກໍ່ສ້າງ ແລະ ປັບປຸງ ເຮັດໃຫ້ການໄປມາຫາສູ່ສະຫວ່າງບ້ານຕໍ່ບ້ານ ມີຄວາມສະດວກ, ການເກັບລາຍຮັບເຂົ້າງົບປະມານປະຕິບັດໄດ້ 4.111 ຕື້ກ່ວາກີບລື່ນແຜນປີ 2,7 %. ວຽກງານວັດທະນະທຳ-ສັງຄົມ ເຫັນວ່າຄຸນນະພາບການສຶກສາມີຄຸນນະພາບສູງຂື້ນ,ຂະບວນການສ້າງຄອບຄົວ ແລະ ບ້ານ ຊຈສ, ບ້ານສາທາລະນະສຸກ, ແບບບ້ານວັດທະນະທຳ ແລະ ຂະບວນການແຂ່ງຂັນກິລາກໍ່ເຫັນວ່າເປັນຂະບວນຟົດຟື້ນ,ອົງການປົກຄອງແຕ່ລະຂັ້ນໄດ້ເອົາໃຈໃສ່ເຮັດວຽກງານ ສຶກສາອົບຮມການເມືອງ ແນວຄິດໃຫ້ແກ່ສະມາຊິກພັກ, ພະນັກງານລັດຖະກອນ, ຕະຫຼອດຮອດພໍ່ແມ່ປະຊາຊົນຢ່າງຕັ້ງໜ້າ.

       ໃນຕອນທ້າຍກໍ່ໄດ້ຮັບຟັງການໂອ້ລົມຂອງທ່ານ ພັທ ລັງສີ ຈັນທະມາລີ ກຳມະການພັກແຂວງ-ເລຂາພັກເມືອງ ເຈົ້າເມືອງໆ ວາປີ ປະກອບຄຳເຫັນຕໍ່ກອງປະຊຸມ ໂດຍມອບໃຫ້ພາກສ່ວນທີ່ກ່ຽວຂ້ອງຈົ່ງພ້ອມກັນຈັດຕັ້ງປະຕິບັດພ້ອມທັງຊອກຫາວິທີແກ້ໄຂບັນຫາຕ່າງໆທີ່ເກີດຂື້ນກັບວຽກງານໃນແຕ່ລະດ້ານ.

ອອກ​ຈາກ REPLY ເປັນ

Please enter your comment!
Please enter your name here